सूर्य

सूर्य आग ओकतोय .
भाजून काढतोय तनामनाला .
लेकरं , पाखरं तहानलेली .
हरेक जिवाची काहिली होतेय .
हवीय प्रत्येकाला वृक्षांची सावली .
पोळलेल्या मनावर फुंकर घालणारी माऊली .
सूर्याचे रूप उग्र ! त्याला पर्वा नाही कुणाचीही .
एसीत बसुन सुस्तावलेले दुष्काळावर चर्चा करतात .
दूर रस्त्याच्या कडेला बाभळीच्या झाडाला झोका टांगून तान्हुल्याला झोपवून मायमाऊली दगड फोडतेय .
तिच्या डोळ्यात एक स्वप्न आपल्या बाळाला सूर्य बनविण्याचे .
क्रांतिसूर्य जाब विचारणार आहे .
एक दिवस उगवणार आहे .
विषमतेविरुद्ध लढाई जिंकणार आहे ऊन्हात रडणारा तान्हुला .
तो सूर्य मला पाहायचा आहे .